بعد سنوات من الشغل تعين زميلي في مركز قيادي لوحدة من شركات التسويق الكبيرة.. بقد ما كان زميلي مبسوط بقد ما كان متورط من دون لا يدري.. زميلي جاب العيد في إدارته لوكالة التسويق اللي هو فيها لسبب بسيط أنه ما قد توظف من قبل في وكالة تسويق!.. وكان يعتقد أن عمله السابق في إدارة التسويق لإحدى الشركات هو مشابه تمامًا لإدارة وكالة تسويق.. بعد ما جاب كم عيد أدرك زميلي أن العمل في إدارة تسويق بشركة أو جهة مختلف تمامًا عن إدارة وكالة تسويق!🤯
السبب اللي خلى زميلي كذا هو أنه ببساطة ما تأسس بالشكل الصحيح في وكالة تسويق🛠😎
إذا كنت خريج تسويق أو تحب تدخل عالم التسويق لازم لازم تتوظف في وكالة تسويق أول ما تبدأ حياتك المهنية!👨🎓👩🎓
وكالات التسويق تصقل مهاراتك وتاخذها لمستوى ثاني من التميز.. تعلمك وشلون تتصرف مع عميلك.. تفهمك كيف تصنع المنتجات التسويقية بالشكل الصحيح.. تطور المرونة فيك وقدرتك على حل المشاكل!
هذي المهارات أقولها بالفم المليان 😌 محد بيعلمك إياها غير وكالات التسويق!😊
يا شينك إذا صرت مدير ومنتب عارف وشلون تتعامل مع أساسيات كان المفروض تتعلمها في بداية حياتك المهنية.. عشان كذا مهم جدًا تلتحق في وكالة تسويق بداية حياتك المهنية!😉
مهم أنك تشتغل في بيئة تجارية تخاف على شغلها وتخاف تخسر العميل هذي البيئة بتخلق حلول لكل المشاكل اللي تواجهها عكس الجهات التسويقية اللي تحل مشاكلها عبر الفلوس!
أنت محتاج تتعلم خلق الحلول بأقل التكاليف هذا النوع من حل المشاكل هو اللي يولد فيك القدرة على التعامل مع مختلف الظروف اللي راح تمر عليك على إمتداد حياتك المهنية!🔥
